— Sección · Teatro

O teatro como medio para contar historias en directo.

O noso grupo de teatro denomínase "O Canteiro" e promove de maneira integral proxectos teatrais de diversa índole.

Obras

Obras e creacións teatrais do grupo "O Canteiro".

Obra

A Taberna do Nubeiro

Comedia costumista de tratamento esperpéntico, escrita, dirixida e interpretada polo grupo. A trama transcorre nunha taberna do pobo imaxinario de Brétema, onde un alcalde singular, un párroco moi particular, un taberneiro con moita graza, unha doutora, dúas viúvas, "a meiga" do pobo e a esposa dun eminente político tecen diálogos cheos de humor e retranca. Apta para todos os públicos, mestura teatro tradicional con pequenas intervencións cantadas, interacción co público e a presenza (simulada) de dúas persoas da realeza.
Obra

Quen carallo matou a Suso?

Comedia disparatada sobre as relacións humanas. Unha velada de fin de ano entre familiares e amigos, que prometía ser motivo de alegría, vese truncada pola morte do anfitrión: accidente, suicidio, asasinato? Entre enredos, segredos e situacións absurdas afloran a hipocresía, o amor en todas as súas formas e o desamor disfrazado de rutina. Unha mestura de caos, risas e verdades incómodas que demostra que, cando todo parece ir mal, o humor pode ser a única tabla de salvación.
Obra · En pre-produción

Esta obra é un desastre

Teatro dentro do teatro: unha compañía teatral promove unha obra e os egos, as mentiras, a vaidade e a falta de compañeirismo acaban provocando un auténtico desastre. De ácido humor e con moito de performance, pon en escena as fases de produción e o longo e esforzado camiño que supón a súa posta en marcha. A súa posta en escena sorprenderá a moitos.
Apropósito · En pre-produción

Marineda, chegar e encher

Producida expresamente para representar no Entroido coruñés, baixo a fórmula do "apropósito", un tipo de teatro nacido na Coruña no século XIX. Posta en escena coral arredor da chegada dun cruceiro á cidade, con personaxes como María Pita, Rosalía de Castro, o Papa, Darth Vader ou a noiva de sir John Moore percorrendo os lugares máis acolledores, recoñecidos, artísticos e visitados da vila.
Conto

O conto do canteiro

Versión moderna dun conto tradicional xaponés, dirixida ao público infantil. Pon en valor a importancia e a sorte de que cada neno sexa diferente: que obteña boas notas ou peores, sexa bo deportista ou non, máis delgado ou menos, non é máis que unha característica que o fai único. Cunha linguaxe visual e oral adaptada e participación activa do público para que a mensaxe cale mellor.

Cinco obras escritas, dirixidas e interpretadas polo propio elenco. Sen guións alleos, sen clásicos adaptados — texto propio, voz propia.

A función

Estrea · 23 maio 2026.

Cartel de Quen carallo matou a Suso? coa marca «Entradas esgotadas» · Forum Metropolitano, sábado 23 de maio de 2026 · haberá novas representacións a partir de setembro

Elenco

As persoas detrás das obras.

O grupo O Canteiro está formado actualmente por 20 actrices, actores, dirección, rexedoría e produción. Cada unha con voz e motivos propios para subir ao escenario.

Adela Castro

Actriz

PASA CAN !!

Se algo me fascina do mundo do teatro é que unha sempre aprende frases elegantes e sinxelas que fomentan o crecemento intelectual e moral e ademais resultan extremadamente útiles na vida real.

Alberto Gómez

Director, guionista e actor

Amo o teatro!

Descubrín que co teatro pódense compartir historias, que emocionan… e tamén que os aplausos soan mellor cando non esqueces o texto!

Só aspiro a seguir aprendendo e gozar, cada día, co marabilloso equipo de "O Canteiro".

Almudena Gracia

Actriz

Despois de todo, a vida é puro teatro!

Sempre soñei con ser actriz. O teatro ensinoume que nunca é tarde e que, ás veces, os soños cúmprense.

Unha vez que coñeces o doce "veleno" do escenario sabes que nunca haberá mellor lugar para vivir e soñar.

Asun Couto

Actriz

Viva o teatro!!

O teatro para min é pura maxia, fai que te transformes en décimas de segundo. Cando pisas o escenario os problemas non existen e se consegues sacar un pequeno sorriso, a felicidade é completa.

Aurora Rodríguez

Actriz

O teatro é desobediencia controlada: único lugar onde podes berrar, chorar, romper, amar e morrer sen que te encerren. Un laboratorio onde ensaias todo o que a vida real che censura.

Bea Aguado

Actriz

Sempre tiven que interpretar un rol moi serio; o teatro deume a posibilidade de xogar outros papeis, aínda que o director sempre me dá o papel serio. Encasilleime.

Begoña Cadavid

Rexedora

Formar parte deste grupo serviume para valorar e admirar cada día máis o talento e a dedicación das actrices e actores que o compoñen.

Dori Fernández

Actriz

Un día decides probar algo que sempre che gustou, o teatro. Marabillosa casualidade dar co grupo "O Canteiro".

Agora gozo, aprendo e divírtome tanto co que fago, como coa xente coa que comparto esta afección.

Fernando Fernández

Actor

Unha das miñas paixóns desde neno é disfrazarme, e co teatro non só conseguín "parecer senón ser" outra persoa en cada obra.

Pero sobre todo o que máis valoro — e emocióname dicilo — é gozar da compañía dos meus compañeiros de "O Canteiro".

Fina Lafuente

Actriz

ANÍMATE!!!!

Xubileime e para min abriuse o pano. Agora, sen xefes nin horarios, descubro un mundo máxico que sempre chamou a miña atención: O TEATRO.

Nunca é tarde para facer drama, se ao final hai aplausos.

Isabel López

Actriz

Viva o teatro!

Ás veces os soños fanse realidade, só fai falla forza de vontade, interese, traballo e unha dose de sorte. No meu caso todos estes ingredientes coincidiron hai uns anos, e así un grupo de amigos cos mesmos intereses puxemos en marcha este marabilloso grupo de teatro que é "O Canteiro".

A felicidade é maior cando un fai o que lle gusta, e faino nun ámbito de respecto, traballo compartido e moita ilusión.

Juan Carlos Fernández

Actor

A pesares de haber feito, hai moitos anos "pinitos" teatrais, nunca imaxinei involucrarme desta maneira co teatro. Grazas Dori, Bego e Alberto (e todo o grupo) por animarme continuamente.

Lucía Cifuentes

Directora

Estou feliz de formar parte deste grupo de teatro, composto por excelentes actrices e actores e marabillosas persoas.

Manolo Gómez

Produtor, actor

Ás veces síntome como unha ola exprés; o teatro é a miña válvula de escape.

Manu Rocandio

Actor

O teatro esperpéntico que facemos en "O Canteiro" é un concepto cultural que ofrece teatro accesible, popular, irónico e de contido social, afastándose do comercial.

Manuel Méndez

Actor, rexedor

Formar parte do elenco de "O Canteiro" serviume, entre outras moitas cousas, para corroborar aquilo de que "a vida é puro teatro".

María Fraga

Actriz, rexedora

Viva a farándula!

Formar parte de "O Canteiro" permitiume pequeniñas colaboracións como actriz esporádica, rexedora ou tradutora, pero sobre todo coñecer unhas persoas estupendas e cheas de entusiasmo polo teatro.