Espectacular éxito na estrea da obra teatral Quen carallo matou a Suso?
Espectacular e inesperado éxito o obtido o pasado día 23 de maio na estrea da obra teatral Quen carallo matou a Suso?, a última produción do noso grupo teatral "O Canteiro".
A pesar de coincidir con outros eventos culturais, musicais e teatrais, o Forum Metropolitano da Coruña, cun aforo para 300 persoas, resultou insuficiente para acoller a gran demanda de entradas que se produciu, especialmente durante os últimos días da semana. De feito, polo menos unhas 200 persoas, que se achegaron á taquilla para adquirir a súa entrada, tiveron que conformarse coa promesa de que haberá novas representacións tras o parón estival.
A posta en escena resultou case perfecta, e a información recollida permitiranos facer pequenos axustes para garantir, se cabe, unha mellora nas seguintes representacións desta divertidísima comedia.
A satisfacción do público, se se mide polos aplausos e o cariño brindados ao equipo artístico, déixanos un listón moi, pero que moi alto.
Grazas a todos por seguirnos, acompañarnos e permitirnos que durante algo máis dunha hora vos contemos as nosas historias. ¡¡Viva o teatro!!